Es liid es Dorf am Zugersei
Mer cha bigott kais schöüners gsei
Die Lüüt sind brav mer weiss nid wie
Und d'Wält isch halt am schöünschte hie.

Es gid da Fiige, Cheschtene
Und Chriesi vo de Beschtene
Das Dorf liid ganz am Wasser aa
Drum chasch au Kirsch mit Wasser haa.

De Fisch im Sei isch gwöndli stumm
De Fisch im Wappe isch nid dumm
Wenn eine da guet rede chaa
So heisst er sicher Hürlimaa.

Es heisst z'Walchwil nid umesuscht
Wer gschiider isch, de siig e Ruscht
De Schnäggemänzi i siim Chlapf
Hed gsaid ich siig e ganze Zapf.

Mer ässid all das gliiche Brout
Die Müller, Aenzler, Rölli, Rout
Drum simmer eister einig grad
I allem wo's a Gäldsack gaad.

Es gid z'Walchwil kei böüsi Lüüt
Vom schlächte Läbe weiss mer nüüt
De Schwanz vom Tüüfel isch scho schtumpf
Bi üüs isch halt de Pfarrer Schlumpf.

Mier gönd bis jetz i d' Halbtagsschuel
Es gfallt üüs nid rächt uf dem Schtuel
Mier heigits wie im Schtall de Bless
So said de Schuelinschpäckter Hess.

E Güggel bruuchts im Hüenerschtall
Dee chräjet luut und luogt für all
Und so füert au das Regimänt
I üüser Gmeind de Presidänt.

Das Nizza hie am Zugerseei
Wönd Jahr für Jahr vill Fröndi gsei
Walchwil wird s'reinschti Paradies
So will's de Dokter Alowis.

De Jodelklupp und Kampingplatz
Die sind de öppe nid für d'Katz
Wenn d'Kuurgescht nid wönd Gäld zurgglaa
So singid mier si eifach aa.

Mier händ jetz ä Paradeschtraass
Es Schtrandbaad au und weiss ich waas
Und wüssid was am Schönschte wär?
Zum Schtüüre es paar Milionäär.

Ich bi lang i de Fröndi gsii
Und gaa ja furt scho wider glii
Doch mängisch tuo'n im Traum ich gsei
Miis Heimatdorf am Zugersei.

Ja es isch esou.

Walchwil, am 25. Juli 1954